Para Gjykatës Themelore në Prishtinë, të akuzuarit për veprën penale "shkaktim i trazirave dhe rrezikim i rendit dhe qetësisë publike" u deklaruan të pafajshëm, ndërsa vendimi është caktuar të shpallet më 1 korrik.
Gjatë shënimit të Vidovdanit në Gazimestan më 28 qershor, Policia e Kosovës ndaloi 37 persona, me arsyetimin se kishin provokuar masën dhe nxitur urrejtje përmes parullave. Një person është gjobitur, ndërsa ndaj 36 të tjerëve ka nisur procedura gjyqësore, pa masë paraburgimi.
Avokati mbrojtës, Nikolla Todoroviq, bëri të ditur se të akuzuarve u janë konfiskuar dokumentet e identifikimit. Ai shtoi se shumica janë shtetas të huaj, kryesisht serbë nga Serbia dhe vendet e rajonit, të cilët e kanë të pamundur të kthehen në vendbanimet e tyre deri në shpalljen e vendimit.
Në hyrje të Gazimestanit, Policia e Kosovës kishte paralajmëruar se nuk do të lejohej shfaqja e simboleve që nxisin urrejtje ndëretnike, fetare apo politike. Gjatë tubimit, disa të pranishëm brohoritën "Kosova është Serbi" dhe interpretuan këngë tradicionale.
Në lidhje me ngjarjen, Dioqeza e Rashkës dhe Prizrenit e Kishës Ortodokse Serbe deklaroi se nuk e arsyeton asnjë thirrje për dhunë ose cenim të rendit publik. Megjithatë, institucioni fetar theksoi se shprehja paqësore e identitetit përmes këngëve popullore dhe veshjeve tradicionale nuk duhet të konsiderohet kërcënim. Gjithashtu, Kisha shprehu shqetësim mbi pretendimet se disa nga të ndaluarit kanë qenë subjekt i keqtrajtimit fizik dhe psikologjik gjatë procedurave policore.
Përditësime
Inspektorati Policor i Kosovës (IPK) ka nisur hetimet lidhur me pretendimet për keqtrajtim fizik dhe psikologjik ndaj 36 të ndaluarve në Gazimestan, të cilët kanë raportuar se janë detyruar të thërrasin parullën "Kosova Republikë". Institucioni i Avokatit të Popullit, nën drejtimin e Naim Qelajt, ka hapur hetim zyrtar pas kërkesës urgjente të Avokatit të Popullit të Serbisë, Zoran Pashaliq.