Pas ngjarjeve të shënuara më 28 qershor në Gazimestan, gjatë përkujtimit të Vidovdanit, Gjykata Themelore në Prishtinë ka marrë vendim për 36 persona, të cilët u ndaluan nga autoritetet për shkaktim të trazirave dhe rrezikim të rendit dhe qetësisë publike. Të akuzuarit janë dënuar me dëbim nga territori i Republikës së Kosovës për një periudhë 3-vjeçare, si dhe me një gjobë prej 700 eurosh për secilin.
Në total, gjatë këtij manifestimi, Policia e Kosovës kishte shoqëruar për intervistim 37 persona, pasi ata kishin provokuar masën duke brohoritur parulla me elemente të nxitjes së urrejtjes, në kundërshtim me rregullat e njoftuara nga autoritetet. Një personi i është shqiptuar gjobë për kundërvajtje, ndërsa 36 të tjerët janë proceduar nga gjykata.
Paralelisht me këtë vendim, Policia e Kosovës ka iniciuar një rast për veprën penale "Nxitja e përçarjes dhe mosdurimit" ndaj një shtetasi të panjohur nga Serbia. Bazuar në informacionet e inteligjencës të pranuara më 30 qershor, i dyshuari ka publikuar një video me përmbajtje që nxit urrejtje, të realizuar gjatë qëndrimit të tij në Gazimestan. Verifikimet nga autoritetet kufitare konfirmuan se ky person është larguar nga Kosova më 28 qershor nëpërmjet pikëkalimit kufitar në Jarinjë. Rasti mbetet nën hetim nga prokuroria kompetente.