Policia e Kosovës ka reaguar ndaj raportimeve të publikuara kryesisht në mediat serbe, sipas të cilave persona të maskuar shqiptarë kishin vendosur pengesa në rrugë dhe kishin qëlluar me 10 plumba ndaj policisë serbe në zonën Madljikë, të njohur si Zona Tokësore e Sigurisë në Serbinë jugore. Ky incident pretendohet se ka ndodhur rreth datës 26 shkurt 2026.
Policia e Kosovës sqaron se ka ndërmarrë të gjitha masat e nevojshme policore dhe verifikuese institucionale, duke rezultuar se nuk ka asnjë dëshmi apo të dhënë zyrtare për ndonjë rast të tillë në brezin kufitar të zonës në fjalë. Kjo zonë lidhet me fshatin Reqicë në territorin e Republikës së Kosovës.
Sipas njoftimit zyrtar, ky raportim është i ngjashëm me atë të datës 7 shkurt 2026, ku pretendohej se më 5 shkurt 2026, rreth orës 16:00, kishte pasur të shtëna me mbi 100 plumba nga armë automatike në drejtim të policisë serbe në fshatin Parada të Kurshumlisë, në territorin e Serbisë. Autorët, sipas atyre raportimeve, kishin ikur drejt territorit të Kosovës. Policia e Kosovës shpreh dyshime për orkestrim të qëllimshëm të këtyre dezinformatave.
Deri më tani, bazuar në të gjitha burimet në dispozicion, nuk ka konfirmim për ndonjë incident të tillë, qoftë për ditën e fundit apo për 5 shkurt 2026. Për situatën është njoftuar KFOR-i, ndërsa patrullimet e përbashkëta në brezin kufitar vazhdojnë normalisht. Policia e Kosovës thekson përkushtimin ndaj ruajtjes së rendit dhe sigurisë publike.