Policia e Kosovës njoftoi se mëngjesin e 30 qershorit 2026, rreth orës 07:47-07:50, ka pranuar një telefonatë nga një person që fliste gjuhën serbe, i cili kërcënoi për vendosjen e një mjeti shpërthyes në Stacionin e Autobusëve në Prishtinë.
Pas alarmit, njësitë policore të Stacionit Policor Jugu evakuan qytetarët dhe siguruan perimetrin, ndërsa në vendin e ngjarjes u angazhuan Njësia për Trajtimin e Mjeteve Shpërthyese, Njësia K9, hetues rajonalë, zjarrfikësit dhe ekipet mjekësore. Pas kontrollit të plotë të zonës, nuk u gjet asnjë mjet i dyshimtë dhe shërbimet në stacion u rikthyen në gjendje normale.
Hetimet për kërcënimet
Sipas Drejtorisë për Hetimin e Krimeve Kibernetike, ky rast është i ndërlidhur drejtpërdrejt me një kërcënim të ngjashëm të datës 22 qershor 2026, që kishte të njëjtin objektiv. Analizat teknike dhe provat elektronike të siguruara nga policia kanë konfirmuar se të dyja telefonatat janë kryer nga i njëjti numër telefoni me bazë në Serbi.
Prokurori kompetent ka autorizuar inicimin e rastit për veprën penale “Lajmërimi apo kallëzimi i rremë”. Policia e Kosovës deklaroi se posedon kapacitete të avancuara për hetime kibernetike dhe do të ndërmarrë të gjitha veprimet e nevojshme, përfshirë bashkëpunimin ndërkombëtar, për të sjellë autorin para drejtësisë. Qytetarët janë ftuar të mos bien pre e dezinformatave, ndërsa institucionet theksuan se çdo sinjalizim mbi sigurinë publike trajtohet me përparësi maksimale.