Deputeti i Aleancës për Ardhmërinë e Kosovës, Besnik Tahiri, në një konferencë për media deklaroi se dyert e sallës plenare të Kuvendit të Kosovës janë të mbyllura, pavarësisht kërkesës së deputetëve të ish-opozitës për mbajtjen e një seance për konstituimin e institucionit legjislativ.
Sipas Tahirit, salla mbetet e mbyllur përkundër faktit se grupi parlamentar kishte njoftuar me shkrim për kërkesën për seancë të jashtëzakonshme kryesuesin e seancës konstituive, Avni Dehari, si dhe Administratën e Kuvendit të Kosovës.
"Siç e patë, dyert e sallës ku sonte do të duhej të konstituohej Kuvendi i Kosovës janë të mbyllura. Janë të mbyllura përkundër faktit që ne si grup parlamentar e kemi lajmëruar me kohë kryesuesin e seancës së konstituimit, po ashtu edhe Administratën e Kuvendit me shkrim, por siç shihet salla është e mbyllur", deklaroi Tahiri.