Nënkryetari i Aleancës për Ardhmërinë e Kosovës, Besnik Tahiri, ka reaguar lidhur me ndryshimet e fundit në ligjin për Dhomat e Specializuara të Kosovës, duke theksuar se këto ndërhyrje janë brenda kompetencave të Kuvendit të Kosovës. Ai sqaroi se qëllimi i ndryshimeve nuk është zhbërja e gjykatës, por përmirësimi i funksionimit të saj.
Sipas Tahirit, ndërhyrja legjislative vjen si pasojë e dështimeve të evidentuara gjatë procesit gjashtëvjeçar. Ai theksoi se kuvendi ka ushtruar të drejtën e tij për të ndërhyrë në një ligj të miratuar më parë nga ky institucion.
"Ajo çka ka ndodhur në Kuvendin e Kosovës është shumë e thjeshtë. Është ndryshuar një ligj i cili vjen si rrjedhojë e shumë dështimeve, jo vetëm në procesin gjashtëvjeçar, mirëpo edhe në aspektin dhe qëllimin për çka është distancuar. Ky kufizim nuk e zhbën, por e përmirëson një institucion i cili synon të ketë drejtësi", deklaroi Tahiri.
Deputeti i AAK-së konfirmoi se vendimi i miratuar është tashmë i plotfuqishëm dhe nuk ndikon në orientimin politik apo qëllimet institucionale të shtetit të Kosovës.