Prokuroria për Krimin e Organizuar në Serbi ka konfirmuar se Agjencia e Inteligjencës dhe Sigurisë (BIA) nuk ka kthyer përgjigje ndaj kërkesave të përsëritura për marrjen në pyetje të figurave kyçe, në kuadër të hetimeve për vrasjen e gjashtë të rinjve serbë në kafenenë Panda në Pejë, ngjarje e ndodhur më 14 dhjetor 1998. Personat që Prokuroria synon të intervistojë janë presidenti i Serbisë, Aleksandar Vuçiç, si dhe ish-drejtuesit e Sigurimit të Shtetit, Jovica Stanishiç dhe Franko Simatoviç.
Avokati i familjeve të viktimave, Ivan Niniç, i cili më 27 korrik kërkoi një reagim nga Kryeprokurori Publik, ka theksuar se kërkesa për dëshminë e Vuçiçit bazohet në deklaratat e këtij të fundit gjatë viteve, ku ka pretenduar se disponon informacione rreth rastit. Në vitin 2013, Vuçiç kishte deklaruar se nuk kishte prova se krimin e kishin kryer shqiptarët dhe paralajmëroi se opinioni publik do të përballej me “të vërteta të tmerrshme”. Niniç argumenton se pozicioni i Vuçiçit si shef i Byrosë për Koordinimin e Shërbimeve të Sigurisë, detyrë që e mban prej vitit 2013, i siguron qasje në informacione të ndjeshme lidhur me këtë ngjarje.
Ndërkohë, Prokuroria ka bërë të ditur se është duke vlerësuar nëse personat e kërkuar posedojnë njohuri të besueshme për hetimin. Lidhur me pretendimet e reja për autorësinë e krimit, të publikuara në një video në rrjetin social Telegram nga Milosh Medenica, ku përmendet Radomir Boban Baqoviç, Prokuroria deklaroi se ky i fundit nuk është marrë asnjëherë në pyetje, pasi nuk është konsideruar dëshmitar i besueshëm.
Hetimet për masakrën në Panda, ku u vranë pesë nxënës të shkollës së mesme – Ivan Obradoviç, Zoran Stanojeviç, Svetisllav Ristiq, Dragan Trifoviq dhe Vukosav Gvozdenoviq – si dhe studentja Ivana Radoviç, kanë nisur në vitin 2016 dhe vazhdojnë të jenë të hapura. Prokuroria theksoi se ende nuk janë siguruar prova të mjaftueshme për të ngritur akuza konkrete dhe shprehu gatishmërinë për t’i dorëzuar një raport të plotë Prokurorisë Supreme Publike për të gjitha veprimet e ndërmarra deri më tani.