Veran Matiq, drejtor ekzekutiv i Shoqatës së Mediave të Pavarura Elektronike (ANEM) dhe kryesues i Komisionit për hetim të vrasjes së gazetarëve në Serbi, të themeluar në shkurt të vitit 2013, ka deklaruar se ka pasur mjaft elemente për t’u punuar me sukses në zgjidhjen e vrasjes së vëllezërve Bytyqi dhe të rastit të vrasjes së pesë të rinjve në kafenenë "Panda" në Pejë.
Ai e tha këtë në podkastin "Ćao Nevena" të Nova’s. “Morëm informata se ekzistojnë mjaft elemente që të punohet me sukses për zgjidhjen e rastit të vrasjes së vëllezërve Bytyqi”, u shpreh Matiq.
Vëllezërit Yll, Agron dhe Mehmet Bytyqi ishin luftëtarë të Ushtrisë Çlirimtare të Kosovës, pjesëtarë të njësitit të vullnetarëve "Atlantiku". Më 23 qershor 1999, pak ditë pas çlirimit të Kosovës, ata ndihmuan një familje rome nga Prizreni drejt kufirit me Serbinë, drejt Kralevës. Gjatë udhëtimit kaluan paqëllimshëm kufirin, u arrestuan nga policia serbe dhe u dënuan nga Gjykata për Kundërvajtje në Prokuple me 15 ditë burgosje.
Kur po përfundonin dënimin, i dërguan në një bazë trajnimi të policisë serbe, ku i vranë me plumba pas koke dhe u zhdukën gjurmët. Trupat u gjetën në vitin 2001 në një varrezë masive në Petrovo Sello, afër qytezës Kladovo, bashkë me shqiptarë të tjerë të vrarë nga forcat serbe gjatë luftës në Kosovë.
Në tetor të vitit 2019 dhe në korrik të vitit 2022, Dhoma e Përfaqësuesve e Kongresit Amerikan miratoi dy rezoluta, me të cilat SHBA kërkoi nga Serbia veprime konkrete dhe bashkëpunim me drejtësinë ndërkombëtare për të nxjerrë para drejtësisë personat e përfshirë në këtë krim.