Ljubica Trifoviq, nëna e Dragan Trifoviqit, njërit prej gjashtë të rinjve të vrarë në sulmin e 14 dhjetorit 1998 në kafenenë Panda në Pejë, ka kërkuar zyrtarisht zbardhjen e rrethanave të këtij krimi. Në një intervistë për portalin serb Nova.rs, ajo ka hedhur akuza të drejtpërdrejta ndaj strukturave të sigurisë së Serbisë, duke pohuar se pas vrasjes nuk qëndronin shqiptarët, por forcat shtetërore serbe.
Trifoviq shprehu gatishmërinë për të paditur shtetin, por theksoi se objektivi kryesor mbetet informimi i opinionit publik. Ajo kritikoi presidentin Aleksandar Vuçiq për heshtje, pavarësisht deklaratave të tij se publiku do të tronditej kur të mësonte të vërtetën për këtë rast. Sipas saj, Vuçiq ka premtuar disa herë takime me familjarët e viktimave, të cilat nuk janë realizuar kurrë, duke u kontaktuar vetëm gjatë fushatave zgjedhore.
Një pjesë e rëndësishme e deklaratave të Trifoviqit fokusohet në lidhjen politike të masakrës me zhvillimet e mëvonshme në Kosovë. Ajo deklaroi se masakra në kafenenë Panda u shfrytëzua nga regjimi i atëhershëm për të ndikuar në rrjedhën e ngjarjeve, duke vlerësuar se “po të mos kishte ndodhur Panda, nuk do të kishte ndodhur as Reçaku”.
Në intervistë, ajo kërkoi përgjigje jo vetëm për ekzekutorët, por mbi të gjitha për ata që dhanë urdhrin për krimin, i cili ndodhi gati tri dekada më parë. Trifoviq përmendi gjithashtu se institucionet serbe shmangin përballjen me të kaluarën, duke krahasuar heshtjen për rastin Panda me vrasjen e Oliver Ivanoviqit dhe sulmin në Banjskë. Familjet e viktimave, sipas saj, mbeten të vendosura për të kërkuar drejtësi dhe nuk do të pranojnë mbylljen e çështjes pa zbardhjen e plotë të autorësisë dhe urdhërdhënësve.
Masakra në lokalin “Panda” mbetet një nga ngjarjet më të debatueshme të periudhës së para luftës në Kosovë. Fillimisht, autoritetet e atëhershme serbe ia atribuuan përgjegjësinë Ushtrisë Çlirimtare të Kosovës, por më vonë është vërtetuar se masakra u krye nga forcat serbe.