Presidentja e Kosovës Vjosa Osmani, kryeministri në detyrë Albin Kurti, kryetari i Kuvendit Dimal Basha dhe ish-shefi i Misionit Verifikues të OSBE-së William Walker kanë bërë homazhe në Kompleksin Memorial në Reçak, me rastin e 27-vjetorit të Masakrës së Reçakut, të ndodhur më 15 janar 1999.
Homazhe kanë bërë gjithashtu kryetari i Partisë Demokratike të Kosovës Bedri Hamza bashkë me strukturat e partisë. Ngjarja u shënua në nderim të 45 viktimave civile, të vrarë nga forcat serbe gjatë luftës në Kosovë.
Vjosa Osmani deklaroi se masakra ishte dëshmi e synimit të regjimit serb për të zhdukur popullin shqiptar nga Kosova. Ajo theksoi se dhimbja mbetet e freskët për familjet dhe popullin, për shkak të mungesës së drejtësisë. Osmani shtoi se Serbia vazhdon me të njëjtat politika dhe mendësi, duke mohuar krimin, çka e quajti krim të dyfishtë. Ajo premtoi se Kosova do ta mbrojë të vërtetën kudo në botë dhe se themelet e shtetit janë ndërtuar mbi sakrificën e martirëve dhe dëshmorëve të UÇK-së.
Albin Kurti e cilësoi masakrën si plagë të hapur pa drejtësi dhe theksoi rolin e William Walker-it në zbulimin e krimit, që ndërgjegjësoi opinionin ndërkombëtar dhe kancelaritë perëndimore për krimet e luftës dhe kundër njerëzimit. Kurti u zotua se institucionet do të angazhohen për të sjellë kriminelët para gjyqit. Ai nderon 45 martirët e Reçakut dhe 11 dëshmorët e kombit, të udhëhequr nga komandanti Ahmet Kaçiku.
Bedri Hamza tha se masakra ka kontribuar në lirinë dhe pavarësinë e Kosovës dhe falënderoi William Walker-in për publikimin e ngjarjes.
Përditësime
Prokuroria Speciale ka ngritur aktakuzë ndaj 22 personave për Masakrën e Reçakut.
Qemajl Aliu, kryetari i Komunës së Shtimes, mori pjesë në homazhe, duke e cilësuar Masakrën e Reçakut si dëshmi të krimeve kundër njërëzimit.
Homazhe u mbajtën gjithashtu në Varrezat e Dëshmorës në Shtime dhe Mollopolc.
Midis 45 viktimave ishte një djalë 12-vjeçar.
Kryeministri Albin Kurti foli në akademinë përkujtimore në Shtëpinë e Kulturës në Shtime.
Ai lidhi masakrën e Reçakut drejtpërdrejt me ndërhyrjen e NATO-s, falënderoi partnerët ndërkombëtarë dhe përmendi librin "Reçak: Historia e një krimi lufte" të William Walker-it.
Lumir Abdixhiku i LDK-së kritikoi mungesën e drejtësisë për masakrat dhe gjykimet e padrejta ndaj udhëheqësve të UÇK-së, teksa delegacionet e partive opozitare, përfshirë LDK-në, morën pjesë në homazhe dhe bënë deklarata.