Albulena Haxhiu, ushtruesja e detyrës së presidentes dhe kryetare e Kuvendit të Kosovës, bashkë me një delegacion nga Kuvendi dhe kabineti qeveritar, bëri homazhe në Rezallë të Skenderajt për 27-vjetorin e masakrës së 5 prillit 1999.
Ajo rikujtoi se atë ditë, në Rezallë dhe fshatrat përreth, u zbatua plani i shfarosjes nga regjimi i Serbisë ndaj popullatës civile shqiptare. Djem e burra nga mosha 13 deri në 90 vjeç u ndanë nga familjet, u plaçkitën, u nxorën dhunshëm nga shtëpitë dhe u pushkatuan. Trupat e tyre u rrëmbyen dhe u përdorën për të hapur varre masive në Serbi, me qëllim fshehjen e gjurmëve të krimit gjenocidal.
Haxhiu theksoi se gjurmët e krimit nuk do të fshihen kurrë dhe krimet e Serbisë do të mbahen mend në kujtesën e familjarëve dhe kolektive. Institucionet e Republikës së Kosovës do të angazhohen për drejtësi për masakrën e Rezallës, si dhe për të gjitha masakrat, vrasjet, dhunimet, shkatërrimet dhe dëbimet e kryera nga Serbia në Kosovë.
Sipas të dhënave, në këtë masakër u ekzekutuan 98 shqiptarë, 44 prej tyre u zhdukën dhe vetëm 3 persona shpëtuan. Ajo përfundoi me fjalët: "Lavdi dëshmorëve dhe martirëve! Lavdi të gjithë dëshmorëve të kombit!".