Ushtruesja e detyrës së presidentes së Republikës së Kosovës, Albulena Haxhiu, dhe ministri në detyrë për Punë, Familje dhe Vlerat e Luftës Çlirimtare, Andin Hoti, kanë marrë pjesë në ceremoninë përkujtimore të 27-vjetorit të Masakrës në Bukosh të Suharekës, më 3 maj 2026.
Më 3 maj 1999, forcat serbe i ndanë dhunshëm 25 civilë shqiptarë, burra dhe djem nga mosha 5 deri në 85 vjeç, nga kolona e familjeve të dëbuara dhe i ekzekutuan pranë mureve të shkollës lokale.
Haxhiu theksoi se civilët u morën nga familjet e tyre, të cilat u detyruan të vazhdojnë rrugën e dëbimit, ndërsa ata u pushkatuan pa përballje të armatosur. "Kjo nuk është rast i izoluar, por dëshmi e gjenocidit dhe spastrimit etnik që Serbia e ka bërë në Republikën e Kosovës", deklaroi ajo. Sipas saj, qëndresa e shqiptarëve, lufta e Ushtrisë Çlirimtare të Kosovës dhe mbështetja ndërkombëtare çuan në çlirimin, lirinë dhe pavarësinë e Kosovës.
Ajo premtoi angazhim të vazhdueshëm të institucioneve për drejtësi. "Nuk mund të vazhdojmë tutje pa pasur drejtësi për krimet e luftës. Kërkesa e familjarëve është që të ketë drejtësi për këto raste", tha Haxhiu, duke përmendur mundësinë e gjykimeve në mungesë për shkak të mosdorëzimit të të dyshuarve nga Serbia.
Ministri Andin Hoti e cilësoi masakrën si pjesë e një tendence për gjenocid nga Serbia, jo thjesht krim lufte. Ai u bëri thirrje të mos harrohen ngjarje të tilla në Suharekë, Rahovec, Prizren dhe gjetkë në Kosovë.
Pas homazheve në Bukosh, Haxhiu dhe Hoti nderuan Heroin Besim Ndrecaj në Therandë. Familjarë dhe qytetarë morën pjesë në ceremoni për të nderuar viktimat.