Ushtruesja e detyrës së Presidentes së Kosovës, Albulena Haxhiu, mori pjesë në konferencën me temë "Së bashku për njohje dhe mbështetje", organizuar në kuadër të Ditës Ndërkombëtare për Eliminimin e Dhunës Seksuale gjatë Konfliktit. Gjatë fjalës së saj, Haxhiu vlerësoi se dhuna seksuale gjatë luftës nuk ishte një pasojë anësore, por një krim i rëndë që synonte shkatërrimin e individit, familjes dhe sigurisë së shoqërisë.
Sipas Haxhiut, në periudhën e pasluftës u fokusua vëmendja te dëmet materiale dhe viktimat e dukshme, ndërsa traumat e brendshme mbetën gjatë në heshtje për shkak të frikës, turpit dhe gjykimit shoqëror. Ajo theksoi se turpi u takon atyre që kryen krimin, atyre që e urdhëruan dhe atyre që e mohuan, duke shtuar se drejtësia mbetet obligim i përbashkët.
Një pikë kritike e adresuar nga Haxhiu ishte roli i misioneve ndërkombëtare në Kosovë, për të cilat ajo deklaroi se nuk u angazhuan seriozisht në adresimin e krimeve të kryera nga Serbia. Ajo u bëri thirrje institucioneve vendore të drejtësisë që të vazhdojnë punën me profesionalizëm për ndëshkimin e autorëve, duke nënvizuar se krimet e luftës nuk parashkruhen dhe nuk amnistohen.
Në mbyllje, Haxhiu garantoi se shteti i Kosovës mbetet i përkushtuar për të ofruar mbështetje për të mbijetuarit, duke u dhënë atyre hapësirën e nevojshme për të ndarë rrëfimet e tyre sipas vullnetit të tyre, pa u detyruar nga presioni i jashtëm.