Ekspozita “Sy më sy | Eye to Eye” është inauguruar në kuadër të Ditës Ndërkombëtare për Eliminimin e Dhunës Seksuale në Konflikt. Ky projekt artistik dhe dokumentar sjell portrete, skanime të irisit dhe dëshmi personale të personave që i mbijetuan dhunës seksuale gjatë luftës në Kosovë, si dhe të familjarëve të tyre.
Ushtruesja e detyrës së presidentes së Kosovës, Albulena Haxhiu, gjatë fjalës së saj vlerësoi punën e Qendrës Kosovare për Rehabilitimin e të Mbijetuarve të Torturës (QKRMT) dhe organizatës Pro Peace Kosovo. Ajo theksoi se rrëfimet e paraqitura në ekspozitë dëshmojnë se dhimbja nuk ka qenë e kufizuar vetëm në periudhën e luftës, por është thelluar edhe në vitet e pasluftës për shkak të heshtjes, gjykimit shoqëror dhe stigmës.
“Një shoqëri që kërkon drejtësi për personat e dhunuar gjatë luftës, duhet së pari të mësojë t’i shohë me respekt dhe mirënjohje për forcën me të cilën kanë vazhduar jetën”, deklaroi Haxhiu.
Drejtoresha e QKRMT-së, Feride Rushiti, shpjegoi se koncepti i ekspozitës është ndërtuar për të vënë publikun përballë së vërtetës. Sipas saj, përdorimi i skanimeve të irisit shërben si një gjurmë identifikuese, duke u dhënë zë atyre që për dekada me radhë kanë mbajtur peshën e traumës në heshtje. Ekspozita synon të shërbejë si një thirrje për njohjen e vuajtjeve dhe përkrahjen institucionale e shoqërore ndaj të mbijetuarve.