Pëllumb Gjoka, biznesmen 49-vjeçar, ndodhet në burg që nga korriku 2023 dhe po gjykohet në Gjykatën e Posaçme për akuza të rënda, përfshirë vrasje dhe pjesëmarrje në grup të strukturuar kriminal. Këto akuza u zbuluan pas zbërthimit të komunikimeve në aplikacionin e koduar Sky ECC.
Në tetor 2023, Gjykata e Posaçme urdhëroi sekuestrimin e tre tokave pyjore në fshatin Pulaj të Velipojës. Prokurorët argumentuan se këto prona dyshoheshin të ishin përfituar përmes falsifikimesh të kryera më shumë se një dekadë më parë.
Ndërsa tokat bregdetare u bllokuan, kazinoja në qendër të Tiranës dhe kompania Imperial Group sh.a. – e shpallur investitor strategjik nga qeveria – nuk u prekën nga sekuestroja. Gjoka zotëron rreth 56% të aksioneve të kësaj shoqërie, e cila operon në fushën e kazinove.
Pasuria e Gjokës nuk u hetua sipas ligjit Antimafia, mekanizëm që përdoret zakonisht në Shqipëri për konfiskimin e aseteve me origjinë të dyshuar kriminale. Hetimet financiare u kryen vetëm brenda procedimit penal.
Sipas Lirime Çukaj, pedagoge e së drejtës penale në Universitetin e Tiranës, ligji Antimafia ndryshon barrën e provës. «Ai parashikon fillimin e procedimit pasuror pa vendim penal të formës së prerë dhe barra e provës i kalon individit për të justifikuar pasurinë», tha ajo, duke theksuar se bëhet fjalë për vepra që krijojnë produkte financiare si krimi i organizuar.
SPAK nuk dha shpjegime të detajuara, por në përgjigje me shkrim njoftoi se gjatë hetimeve nuk u gjetën probleme për Imperial Group. «Shoqëria nuk është përfshirë në sekuestrime, pasi prokurorët vlerësuan se nuk plotësohen kërkesat ligjore», thuhet në përgjigjen e tyre.