Biznesmeni Pëllumb Gjoka, një prej të akuzuarve në dosjen Metamorfoza, është paraqitur sot para Gjykatës së Posaçme kundër Korrupsionit dhe Krimit të Organizuar (GJKKO), ku ka dhënë dëshminë e tij në lidhje me akuzat për vrasjen e shtetasit Gjin Ndoji.
Gjatë seancës, Gjoka ka kundërshtuar akuzat e prokurorisë, duke pretenduar pafajësinë. Ai deklaroi se nuk ka asnjë provë, përfshirë komunikime në aplikacionin Sky ECC, që të mbështesë akuzat se ai ka ndihmuar në organizimin e krimit apo në gjetjen e vendndodhjes së makinës së përdorur nga autorët. Sipas tij, nëse do të ekzistonte qoftë edhe një provë e tillë, ai do t'i pranonte akuzat.
Sipas Gjokës, procesi ndaj tij është ndërtuar mbi deklarime të pabazuara dhe një "gjyq publik" që synon të ushtrojë presion mbi trupën gjykuese. Biznesmeni u shpreh se ka qenë i kujdesshëm në veprimtarinë e tij 30-vjeçare në fushën e lojërave të fatit dhe lokaleve të natës, ndërsa shprehu shqetësimin për pasojat e rënda të qëndrimit për 3 vite në paraburgim.
Në dëshminë e tij, ai paralajmëroi se pasojat e këtij procesi mund të jenë të rënda për sigurinë, duke deklaruar se janë krijuar situata hasmërie midis familjeve. "Do të vriten njerëz, por përgjegjësia e kujt është?", theksoi Gjoka, duke shtuar se veprimet e institucioneve po detyrojnë njerëzit në drejtime të rrezikshme dhe po ndikojnë negativisht në ekonomi.