Gjykata e Posaçme kundër Korrupsionit dhe Krimit të Organizuar ka shpallur vendimin përfundimtar për biznesmenin Pëllumb Gjoka dhe ish-shefin e Policisë, Ardit Hasanbegaj, në kuadër të dosjes "Metamorfoza".
Pëllumb Gjoka u shpall fajtor për veprat penale të sigurimit të kushteve për të kryer vrasjen e shtetasve Kleanthi Musabelli, Dorjan Duli dhe Ibrahim Lici, pjesëmarrje në grup të strukturuar kriminal, si dhe për korrupsion aktiv të funksionarëve të sistemit të drejtësisë. Gjykata e dënoi fillimisht me 9 vite burg, dënim i cili u zbrit në 6 vite për shkak të gjykimit të shkurtuar. Biznesmeni u shpall i pafajshëm për akuzën e armëmbajtjes pa leje, ndërsa vijon një proces tjetër gjyqësor ndaj tij për akuzën e vrasjes së Gjin Ndojit.
Ndërkohë, Ardit Hasanbegaj u shpall fajtor për sigurim kushtesh për vrasjen e Dorjan Dulit dhe Ibrahim Licit, si dhe për pjesëmarrje në grup të strukturuar kriminal. Dënimi i tij prej 7 vitesh e 6 muajsh u ul në 5 vite burgim për shkak të gjykimit të shkurtuar. Gjykata vendosi edhe masën plotësuese të heqjes së të drejtës për të ushtruar funksione publike. Të dy të dënuarit do ta vuajnë dënimin në një institucion të sigurisë së lartë.
Prokuroria e Posaçme (SPAK) kishte kërkuar dënime më të larta, përkatësisht 14 vite burg për Pëllumb Gjokën dhe 9 vite burg për Ardit Hasanbegajn.