Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka shpallur vendimin nr. 63, datë 30 korrik 2026, për ish-oficerin e policisë gjyqësore, Igli Haxhiaj. Trupi gjykues, i përbërë nga gjyqtarët Atalanta Zeqiraj, Marinela Osmani dhe Besmir Stroka, e deklaroi atë fajtor për tri vepra penale.
Sipas vendimit, dënimet për akuzat ndaj Haxhiajt janë si më poshtë:
• 2 vjet burgim për “Zbulimin e akteve ose të dhënave sekrete”;
• 3 vjet e 6 muaj burgim për “Korrupsionin pasiv të gjyqtarëve, prokurorëve dhe funksionarëve të tjerë të organeve të drejtësisë”;
• 2 vjet e 6 muaj burgim për “Shpërdorim të detyrës”.
Në zbatim të nenit 55 të Kodit Penal, gjykata bashkoi dënimet në një masë të vetme prej 4 vitesh burgim. Në aplikim të procedurës së gjykimit të shkurtuar, kjo masë u reduktua me një të tretën, duke e çuar dënimin përfundimtar në 2 vite e 8 muaj heqje lirie. Haxhiaj do ta vuajë dënimin në një burg të sigurisë së zakonshme, ndërsa koha do të llogaritet nga data e ndalimit, 27 nëntor 2025.
Hetime nga SPAK zbuluan se Haxhiaj, në cilësinë e oficerit të Drejtorisë së Forcës së Posaçme Operacionale, kishte dekonspiruar informacione hetimore në kuadër të një procedimi për trafik ndërkombëtar droge, që implikonte grupin e Elvis Doçit, i njohur edhe si Visi i Pojës. Sipas provave të administruara nga komunikimet në platformën e enkriptuar Sky ECC, i pandehuri kishte shkëmbyer informacione sekrete me shtetasin Denis Myftiu në këmbim të pagesave që varionin nga 5 deri në 15 mijë euro.
Krahas dënimit me burg, gjykata i ka hequr të drejtën të pandehurit për të ushtruar funksione publike për një periudhë prej 5 vitesh. Gjithashtu, të gjitha shpenzimet e fazës së hetimit paraprak dhe të procesit gjyqësor i janë ngarkuar të dënuarit. Kundër këtij vendimi mund të ushtrohet ankim në Gjykatën e Posaçme të Apelit për Korrupsionin dhe Krimin e Organizuar brenda 15 ditëve nga dita pasuese e marrjes dijeni për vendimin e arsyetuar.