Gjykata Kundër Korrupsionit dhe Krimit të Organizuar (GJKKO) ka shpallur vendimin për procedimin penal nr. 12/1 të vitit 2024 të Prokurorisë së Posaçme kundër Korrupsionit dhe Krimit të Organizuar, ndaj të pandehurve Klajdi Zhilla dhe Geraldo Fuçija, ish-inspektorë të IMT. Të akuzuarit u dënuan për veprën penale të korrupsionit pasiv të personave që ushtrojnë funksione publike, në bashkëpunim.
Çështja u shqyrtua me procedurën e gjykimit të shkurtuar. Trupi gjykues, i përbërë nga gjyqtarët Rudina Palloj, Flojera Davidhi dhe Bib Ndreca, deklaroi fajtor të dy të pandehurit.
Fillimisht, secili u dënua me nga 3 vite burgim. Në zbatim të nenit 406/1 të Kodit të Procedurës Penale, për shkak të gjykimit të shkurtuar, dënimi u ul me një të tretën, duke u caktuar në 2 vite burgim për secilin.
Në zbatim të nenit 59 të Kodit Penal, gjykata vendosi pezullimin e ekzekutimit të dënimit me burgim dhe vënien në provë për një periudhë 2-vjeçare. Kushtet përfshijnë moskryerjen e vepre tjetër penale dhe mbajtjen e kontakteve me Shërbimin e Provës që mbulon vendbanimin e tyre.
Ndaj secilit u caktua edhe dënimi plotësues i heqjes së së drejtës për të ushtruar funksione publike për një periudhë 5-vjeçare.
Gjykata vendosi heqjen e masës së sigurimit arrest në burg, të caktuar më herët, dhe urdhëroi lirimin e menjëhershëm të të pandehurve nga paraburgimi, nëse nuk mbahen për shkak të vendimit tjetër.