Gjykata e Posaçme e Shkallës së Parë për Korrupsionin dhe Krimin e Organizuar dënoi më 24 shkurt 2026 ish-inspektorët e Inspektoratit të Mbrojtjes së Territorit (IMT), Klajdi Zhillën dhe Geraldo Fuçijan, për veprën penale "Korrupsioni pasiv i personave që ushtrojnë funksione publike", në bashkëpunim, parashikuar nga neni 259/2 në lidhje me nenin 25 të Kodit Penal.
Ata marrën 1 mijë euro rryshfet për të mos hequr tendën e një lokali në Tiranë. Denoncimi erdhi nga pronari i lokalit.
Me vendimin nr. 20, në procedurë të gjykimit të shkurtuar, gjykata vendosi:
- Deklarimin fajtor të Klajdi Zhillës dhe dënimin me 3 vite burgim, i ulur në 2 vite sipas nenit 406/1 të Kodit të Procedurës Penale.
- Pezullimin e ekzekutimit të dënimit dhe vënien në shërbim prove për 2 vite, sipas nenit 59 të Kodit Penal.
- Heqjen e të drejtës për ushtrim funksionesh publike për 5 vite.
Të njëjtat masa u aplikuan edhe ndaj Geraldo Fuçijanit.
Trupi gjykues përbëhej nga gjyqtarët Rudina Palloj, Flojera Davidhi dhe Bib Ndreca. Çështja nr. 12/1 të vitit 2024 u ngrit nga Prokuroria e Posaçme kundër Korrupsionit dhe Krimit të Organizuar.
Gjatë operacionit policor u sekuestruan 3000 euro dhe 27 000 lekë, një automjet Audi A6 si dhe 4 celularë, të dyshuara si përfitime nga veprimtaria.