Gjykata e Posaçme e Shkallës së Parë për Korrupsionin dhe Krimin e Organizuar (GJKKO) shpalli fajtor të pandehurin Gentjan Hoxhalli, ish-efektiv policie në Durrës, për kryerjen e veprës penale të korrupsionit pasiv të personave që ushtrojnë funksione publike, të parashikuar nga neni 259 i Kodit Penal. Vendimi nr. 18, i datës 23 shkurt 2026, u mor nga trupi gjykues me kryesuese gjyqtaren Irena Gjoka, Engjëllushe Tahiri dhe Besmir Stroka.
Prokuroria e Posaçme kundër Korrupsionit dhe Krimit të Organizuar (SPAK) paraqiti kërkesën për gjykimin e Hoxhallit, i cili akuzohej se kishte marrë 60 mijë lekë ryshfet nga një qytetar për të mos i bllokuar makinën ose për të mos i vendosur gjobë. Gjykimi u zhvillua me rregullat e gjykimit të shpejtuar.
Vendimi i plotë i gjykatës
GJKKO vendosi:
- Deklarimin fajtor të Gentjan Hoxhalli dhe dënimin fillestar me 3 vite burgim.
- Uljen e dënimit me një të tretën, sipas nenit 406 të Kodit të Procedurës Përnale, në 2 vite burgim.
- Pezullimin e ekzekutimit të dënimit, sipas nenit 59 të Kodit Penal, me shërbim prove për 4 vite, me kusht që të mbajë kontakte të rregullta me Shërbimin e Provës dhe të mos kryejë vepër tjetër penale.
- Heqjen e të drejtës për ushtrimin e funksioneve publike për 5 vite, sipas nenit 35, paragrafi 2, të Kodit Penal.
- Shuarjen e masës së sigurimit arrest në burg, sipas nenit 261/1, gërma "b", në lidhje me nenin 389 të Kodit të Procedurës Përnale.
Gjykata urdhëroi kthimin e provave materiale, si dy telefona celularë dhe një automjet te i pandehuri, si dhe ngarkimin e tij me shpenzimet procedurale dhe gjyqësore. Hoxhalli ishte arrestuar rreth dy vite më parë nga SPAK.