Irakli Leka, ish-shefi i regjimit në burgun e Lushnjës, u shpall fajtor nga Gjykata e Posaçme e Shkallës së Parë për Korrupsionin dhe Krimin e Organizuar me vendimin nr. 16, datë 16 shkurt 2026. Gjykimi u zhvillua sipas rregullave të gjykimit të shkurtuar, pas denoncimit në emisionin investigativ Stop në shtator 2025.
Të pandehuri u akuzua se kishte marrë 700 euro nga një i burgosur në këmbim të lejes së përkohshme. Trupi gjykues, i përbërë nga gjyqtaret Flojera Davidhi, Atalanta Zeqiraj dhe Marinela Osmani, vendosi:
- Deklarimin fajtor për veprën penale të parashikuar në nenin 259, paragrafi i dytë, të Kodit Penal, me dënim fillestar 3 vjet e 3 muaj burgim.
- Zbritje 1/3 të dënimit sipas nenit 406/1 të Kodit të Procedurës Penale, duke e përcaktuar në 2 vjet e 2 muaj burgim.
- Pezullim të ekzekutimit të dënimit sipas nenit 59 të Kodit Penal, me vënien në provë për 2 vjet. Gjatë kësaj periudhe, Leka detyrohet të mos kryejë vepër tjetër penale dhe të mbajë kontakte me Drejtorinë e Shërbimit të Provës.
Gjykata vendosi shuarjen e masës së sigurimit "arrest në shtëpi", të caktuar më herët me vendimin nr. 94, datë 19 shtator 2025. Irakli Leka humb të drejtën për ushtrim funksionesh publike për 5 vjet. Vendimi mund të ankohet brenda 15 ditëve në Gjykatën e Apelit të Posaçme.
Prokuroria e Posaçme kundër Korrupsionit dhe Krimit të Organizuar paraqiti kërkesën për gjykimin e çështjes penale ndaj Lekës.