Gjykata e Posaçme e Shkallës së Parë për Korrupsionin dhe Krimin e Organizuar (GJKKO) shpalli fajtor Marim Lekën, 39-vjeçar nga Lushnja, për kryerjen e veprës penale "korrupsion aktiv në zgjedhje", të parashikuar nga neni 328 i Kodit Penal. Vendimi nr. 27, i datës 1 prill 2026, u mor në përfundim të gjykimit të shkurtuar.
Gjykata caktoi fillimisht dënim me 1 vit e 9 muaj burgim. Në zbatim të nenit 406 të Kodit të Procedurës Pënale, dënimi u ul me një të tretën, duke u përcaktuar në 1 vit e 2 muaj burgim. Vuajtja e dënimit nis nga dita e arrestimit ose ndalimit të të dënuarit.
Sipas hetimeve të Prokurorisë së Posaçme kundër Korrupsionit dhe Krimit të Organizuar (SPAK), në kuadër të procedimit penal nr. 75/2025, Marim Leka i kërkoi dhe mori kartën e identitetit të Muharrem Toskës (shtetasi M.T.) kundrejt premtimit të 50 mijë lekëve, me qëllim blerjen e votës në favor të Partisë Demokratike në zgjedhjet e përgjithshme të 11 majit 2025. Leka u arrestua në prill 2025, para zgjedhjeve.
Trupi gjykues përbëhej nga gjyqtarët Engjëllushe Tahiri, Atalanta Zeqiraj dhe Besmir Stroka. Gjykata vendosi asgjësimin e provave materiale, përfshirë një CD me biseda ambientale midis Lekës dhe M.T., pas marrjes së formës së prerë të vendimit. Shpenzimet hetimore dhe gjyqësore i ngarkohen të dënuarit. Kundër vendimit mund të bëhet ankim në Gjykatën e Posaçme të Apelit.