Bisedime të drejtpërdrejta Ukrainë-Rusi në Abu Dhabi për fundin e luftës

Për herë të parë që nga viti i kaluar, përfaqësues të Kievit dhe Moskës zhvilluan negociata të drejtpërdrejta në Abu Dhabi, në Emiratet e Bashkuara Arabe. Takimi tre palësh, me ndërmjetësimin e Shteteve të Bashkuara, synoi diskutimin e planit amerikan për t’i dhënë fund luftës kundër Ukrainës. Raundi i parë i negociatave ka përfunduar, njoftoi zyra presidenciale ukrainase.

Negociatori ukrainas Rustem Umerov u shpreh se takimi u përqendrua në kushtet për përfundimin e luftës, por nuk dha detaje të tjera. Presidenti ukrainas Volodymyr Zelensky, në mesazhin e tij me video në mbrëmje, tha se është shumë herët për të nxjerrë përfundime nga bisedimet.

Çështja kryesore: Donbasi

Negociatat u fokusuan kryesisht te territoret, veçanërisht Donbasi, rajoni industrial i Ukrainës lindore. Rusia ka pushtuar një pjesë të madhe të tij ushtarakisht dhe kërkon tërheqjen e Ukrainës nga pjesa e mbetur nën kontrollin e Kievit, si parakusht për paqen. Kievi refuzon tërheqjen vullnetare. Zelensky e quajti çështjen e Donbasit kyçe para fillimit të bisedimeve.

Rajoni i Donjetskut në Donbas mbetet strategjikisht i rëndësishëm për ushtrinë ukrainase për të ndaluar avancimin rus. Administrata Trump ka propozuar demilitarizimin e zonës dhe krijimin e një zone të tregtisë së lirë. Megjithatë, Donbasi është shkatërruar nga luftime të ashpra dhe të dy palët pretendojnë kontrollin e tij.

Mendimi i ekspertit

Politologi Andreas Umland nga Qendra e Stokholmit për Studime të Evropës Lindore i përshkroi bisedimet si "teatër diplomatik". Sipas tij, diskutimet e vitit të kaluar kishin më tepër për qëllim fitimin e favorin e presidentit amerikan Donald Trump, sesa arritjen e armëpushimit apo paqes.

Burimet raportojnë se bisedimet mund të vazhdojnë të shtunën, ndërkohë që lufta vazhdon.