Heqja e barrierave tregtare ndërmjet vendeve të Ballkanit Perëndimor vlerësohet nga bizneset e rajonit sipas Barometrit të vitit të kaluar të realizuar nga Këshilli i Bashkëpunimit Rajonal.
Të dhënat tregojnë se 70 për qind e bizneseve në gjashtë vendet e rajonit e konsiderojnë këtë proces shumë të rëndësishëm ose të rëndësishëm. Bizneset e Shqipërisë dhe Bosnjës shprehin interes më të lartë, ndërsa ato të Serbisë dhe Maqedonisë së Veriut shfaqin gatishmëri më të ulët.
Në Shqipëri, 75 për qind e kompanive të anketuara e quajnë heqjen e barrierave shumë të rëndësishme ose të rëndësishme për veprimtarinë e tyre. Vetëm 9 për qind e tyre mendojnë se ky proces nuk ka rëndësi, ndërsa 5 për qind janë neutralë.
Në Bosnjë dhe Hercegovinë, 88 për qind e të anketuarve e shohin këtë masë si shumë të rëndësishme ose të rëndësishme. Vetëm 1 për qind nuk e konsideron të rëndësishme. Rezultatet tregojnë një konsensus të gjerë të komunitetit të biznesit për lehtësimin e tregtisë ndërkufitare.