Mehmet Bogujevci, ish-boksier dhe kampion i Lojërave Mesdhetare, shpreh bindjen se Kosova ka potencialin dhe kapacitetet njerëzore për të organizuar me sukses këtë ngjarje sportive.
Ai fitoi medaljen e artë në kategorinë welterweight (deri në 67 kilogramë) për përfaqësuesen e Jugosllavisë në Lojërat Mesdhetare të 1979-s në Split. Bogujevci ka ndarë vlerësimet për sfidat organizative dhe pritshmëritë nga sportistët kosovarë.
Sipas tij, organizimi përbën një obligim të madh për shtetin pritës, për shkak të kushteve të shumta infrastrukturore dhe logjistike. Rritja e numrit të shteteve pjesëmarrëse nga 24 në 25 ose 26 shton kompleksitetin, duke kërkuar ndërtimin e fshatit olimpik, sigurimin e akomodimit, kushte të përshtatshme për pritje dhe shoqërim të delegacioneve, si dhe personel që njeh gjuhët e tyre.
Bogujevci vlerëson se Komiteti Olimpik i Kosovës (KOK) ka ekip profesional të aftë, por mbështetja institucionale e shtetit do të jetë vendimtare. "Është shumë obligim i madh. Kërkohen shumë kushte sepse këtu janë 25 a 26 shtete... Komiteti Olimpik i Kosovës është një organizatë jashtëzakonisht mirë e organizuar... jam i bindur se do t’i organizojmë mirë", ka thënë ai.
Në aspektin sportiv, Bogujevci deklaron se Kosova nuk do të mbetet pa medalje, duke veçuar xhudon mes disiplinave me shanse suksesi.