Blerim Gashani, ministër i Rinisë dhe Sportit i Kosovës, foli për përgatitjet për Lojërat Mesdhetare, duke theksuar angazhimin institucional të plotë pavarësisht faktorëve të jashtëm.
Ai nënvizoi se krizat ndërkombëtare dhe inflacioni nuk do të pengojnë punën, pasi çdo vonesë dëmton procesin. «Nuk e di sa duhet të rritet, sepse disa prej çështjeve që nuk varen nga ne janë krizat botërore, që rrisin inflacionin, mirëpo nuk do të merremi shumë me këto sepse çdo marrje është një vonesë», tha Gashani për KosovaPress.
Ligji për Lojërat Mesdhetare është gati dhe pritet të procedohet shpejt e urgjent në qeveri. Dokumenti ishte rikthyer për çështje teknike ose formale, por tani është liruar dhe mund të dërgohet në mbledhjen e parë të qeverisë. Ky ligj do të krijojë kornizën ligjore për hapat e mëtejshëm, përfshirë themelimin e strukturave përkatëse.
Gashani theksoi përkushtimin e të gjithë niveleve. Në proces do të angazhohen Ministria e Rinisë dhe Sportit, kryeministri, ministritë e financave, punëve të brendshme dhe shëndetësisë, si dhe pushteti lokal. Rol të rëndësishëm do të luajnë Komiteti Olimpik i Kosovës, Komuna e Prishtinës dhe komunat e tjera organizatore, të cilat kanë treguar gatishmëri të plotë për bashkëpunim.