Ministria e Rinisë dhe Sportit në Kosovë do të ketë fokus më të qartë në zhvillimin e sportit pas ndarjes nga Ministria e Kulturës. Përgatitjet për Lojërat Mesdhetare dhe investimet në infrastrukturën sportive mbeten prioritet kryesor.
Në një intervistë për KosovaPress, drejtori i Agjencisë për Sport, Fidan Shatri, foli për zhvillimet aktuale, planet konkrete dhe sfidat. Ai theksoi se fokusi i qeverisë ka qenë në infrastrukturën sportive që nga marrja e organizimit të Lojërave Mesdhetare. Qeveria ka zotuar 250 milionë euro për këtë qëllim, të cilat do të shkojnë në projekte të reja dhe renovim të infrastrukturës ekzistuese, siç parashihet në librin e kandidaturës.
Shatri vlerësoi se infrastruktura sportive i takon mandatit të qeverisë dhe se ekziston një plan konkret për Lojërat Mesdhetare. Ai përmendi angazhimin e ministrit Blerim Gashani, i cili vazhdon vizitat në terren për të mbështetur proceset.
Sa i përket ndikimit të situatës politike, Shatri pranoi se mund të ketë ngadalësime për shkak të kompetencave të kufizuara të qeverisë në detyrë, por jo ndalim të proceseve. Ai hodhi poshtë pretendimet për rrezikun e humbjes së organizimit të Lojërave Mesdhetare.