Bordi i Transparencës ka caktuar çmimet e reja tavan për shitjen e karburanteve në vend. Sipas vendimit të datës 21 maj 2026, çmimi i shitjes me pakicë i gazoilit të standardit SSH EN 590 nuk do të kalojë 197 lekë për litër, ndërsa ai i shitjes me shumicë do të jetë jo më shumë se 185 lekë për litër.
Për benzinën e standardit SSH EN, çmimi i shitjes me pakicë është caktuar deri në 186 lekë për litër, ndërsa ai i shitjes me shumicë deri në 174 lekë për litër. Çmimet e reja do të hyjnë në fuqi sot më 21 maj 2026 në orën 13:00 dhe do të jenë të vlefshme deri në mbledhjen e ardhshme të bordit.
Bordi ka theksuar detyrimin e operatorëve të shitjes me shumicë dhe pakicë për të zbatuar vendimin. Në rast shkeljesh do të vendoset pezullimi i aktivitetit. Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë janë angazhuar të mbrojnë interesat e konsumatorëve dhe të ruajnë konkurrencën e ndershme në treg.
Çmimet e caktuara janë nën kufijtë e Aktit Normativ nr. 1, datë 3.4.2026, prandaj niveli i akcizës do të zbatohet i plotë, 100 për qind.
Përditësime
Bordi i Transparencës uli çmimin e naftës me 5 lekë krahasuar me vendimin e mëparshëm. Akti Normativ përcakton pragun prej 220 lekë/l për naftën dhe 200 lekë/l për benzinën, ku zbatohet 80% akcizë mbi këto vlera dhe 100% nën to.