Bordi i Transparencës, në mbledhjen e zhvilluar më 13 maj 2026, vendosi çmimet tavan të karburanteve.
Çmimi i shitjes me pakicë i gazoilit të standardit SSH EN 590 nuk do të kalojë 201 lekë/litër, ndërsa ai i shitjes me shumicë 189 lekë/litër. Për benzinën e standardit SSH EN, çmimi me pakicë është 187 lekë/litër, ndërsa me shumicë 175 lekë/litër.
Çmimet hyjnë në fuqi në të njëjtën ditë në orën 18:00 dhe mbeten të vlefshme deri në mbledhjen e radhës, ku do të reflektohen ndryshimet e çmimeve të shitjes.
Bordi tërheq vëmendjen e operatorëve të shitjes me shumicë dhe pakicë për detyrimin e zbatimit të vendimit. Në rast shkeljesh, do të vendoset pezullimi i aktivitetit.
Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë janë angazhuar për mbrojtjen e interesave të konsumatorëve dhe ruajtjen e parimeve të konkurrencës së ndershme në treg.
Sqarim mbi akcizën
Sipas Aktit Normativ nr. 1, datë 3 prill 2026, që shton ligjin nr. 61/2012 "Për akcizat në Republikën e Shqipërisë", niveli 80% i akcizës zbatohet kur çmimi me pakicë i gazoilit tejkalon 220 lekë/litër ose i benzinës 200 lekë/litër. Me çmimet aktuale nën këto kufij, akciza mbetet 100%.
Burimet raportojnë rritje të çmimeve me pakicë prej 4 lekësh për naftën (nga 197 lekë/litër) dhe 5 lekësh për benzinën (nga 182 lekë/litër).