Këshilli i Ministrave i Bosnjës dhe Hercegovinës ka tërhequr nga shqyrtimi propozimin për dhënien e shtetësisë për nënkryetarin e aplikacionit Telegram, shtetasin rus Ilya Perekopsky. Lajmi u bë i ditur nga ministri i Transportit dhe Komunikimeve, Edin Forto.
Kërkesa e Perekopsky ishte paraqitur me pretendimin se ai përbën një person me rëndësi të veçantë për shtetin. Ajo u mbështet nga Oda Ekonomike e Republikës Sërpska, e cila argumentoi se ndikimi i tij do të ishte pozitiv për zhvillimin ekonomik, konkretisht përmes blerjes së aksioneve në kompaninë EVA Genesis, me seli në Banjallukë. Kjo kompani operon në fusha të ndryshme, si teknologjia e informacionit, marketingu digjital dhe industria e modës. Pronare e kësaj kompanie është Lyudmila Budilova, e cila e ka përfituar shtetësinë e Bosnjës dhe Hercegovinës në shtator të vitit 2025 në rrethana të ngjashme.
Sipas procedurave ligjore, Ministria e Çështjeve Civile kishte kërkuar mendime nga institucionet përkatëse të sigurisë, duke përfshirë Agjencinë e Inteligjencës dhe Sigurisë, Shërbimin për Çështjet me të Huajt dhe Zyrën për Legjislacion. Rezultatet e këtyre verifikimeve nuk janë bërë publike.
Ilya Perekopsky është një bashkëpunëtor i ngushtë i themeluesit të Telegram, Pavel Durov, me të cilin ka bashkëpunuar që nga koha e rrjetit social VKontakte. Gjatë karrierës së tij, ai është marrë me sektorin e financave digjitale, përfshirë projektin blockchain TON, përmes të cilit u mblodhën 1.7 miliardë dollarë në vitin 2018. Megjithëse ai lidhet me projekte ndërkombëtare, në profilet e tij publike nuk figuron ndonjë qëndrim i gjatë në Bosnjë dhe Hercegovinë, ndërsa vetë ai deklaron se banon në Dubai. Përpjekjet për të marrë një koment nga ana e tij, nëpërmjet llogarisë në Instagram dhe numrave të telefonit, rezultuan pa sukses.