Guvernatori i Bankës Qendrore të Republikës së Kosovës (BQK), Ahmet Ismaili, i shoqëruar nga anëtarja joekzekutive e bordit Nora Latifi-Jashari, zëvendësguvernatori Dardan Fusha si dhe bashkëpunëtorë të tjerë, zhvilloi një takim bilateral me drejtues të Bankës së Francës në Washington DC.
Takimi u mbajt në kuadër të Takimeve Pranverore 2026 të Fondit Monetar Ndërkombëtar (FMN) dhe Bankës Botërore (BB). Gjatë tij, Ahmet Ismaili dhe Ivan Odonnat, Drejtor i Përgjithshëm për Operacione dhe Stabilitet Financiar në Bankën e Francës, nënshkruan një marrëveshje të re.
Marrëveshja zgjeron bashkëpunimin në fushën e menaxhimit të mjeteve dhe rezervave ndërkombëtare, duke përfshirë kategori të reja të aseteve. Ajo i mundëson BQK-së hapjen e llogarive të alokuara për rezerva jo-monetare, me pronësi të plotë dhe ndarje të qartë nga asetet e palëve të treta. Kështu, BQK mund t'i përdorë këto rezerva si kolateral në operacione ndërkombëtare, duke rritur fleksibilitetin dhe efikasitetin e menaxhimit të likuiditetit.
Ahmet Ismaili theksoi rëndësinë strategjike të kësaj marrëveshjeje për sektorin financiar të Kosovës. Ai vlerësoi se përfaqëson një hap të rëndësishëm në zgjerimin dhe modernizimin e kornizës për menaxhimin e rezervave, në përputhje me zhvillimet globale.
Palët diskutuan gjithashtu për ngritjen e kapaciteteve të BQK-së, zhvillimin e trajnimeve të specializuara, si dhe mundësitë për përfshirje në fusha të tjera. Midis tyre përmenden ngritja e kapaciteteve në fushën ESG, pjesëmarrja në rrjetet përkatëse dhe bashkëpunimi me institucione të tjera të mbështetura nga Banka e Francës.
Ivan Odonnat theksoi përkushtimin e Bankës së Francës për të mbështetur bankat qendrore në zbatimin e praktikave të qëndrueshme, transparente dhe të sigurt.