Deputeti i Partisë Socialiste Erion Braçe reagoi në rrjetet sociale në lidhje me çmimin e naftës në Shqipëri, në kontekstin e krizës së karburanteve të lidhur me konfliktin në Lindjen e Mesme.
Ai theksoi se çmimi neto i naftës arrin 0.984 euro për litër, duke e vendosur më të lartë se në vendet e rajonit, si Mali i Zi, Greqia, Kosova, Serbia dhe Maqedonia e Veriut.
Sipas Braçes, edhe duke hequr komponentët tatimorë si akciza, TVSH apo taksa e qarkullimit, çmimi në Shqipëri mbetet deri 40% më i lartë se në vendet fqinje. Këtë e mbështet me një analizë të publikuar nga ALTAX dhe platforma Polifakt.
Braçe cilësoi modelin e tregut të karburanteve në vend si abuziv, klientelist dhe të mbrojtur. Ai vuri në dukje se kriza është 90% politikë dhe 10% ekonomi, duke cituar ekspertin Daniel Yergin.
Deputeti përmendi shembullin e Italisë, ku ulja e akcizës nga qeveria nuk u reflektua plotësisht në çmimet për konsumatorët, pasi operatorët nuk e zbatuan atë plotësisht dhe në disa raste rritën çmimet. Në Shqipëri, sipas tij, ekziston rreziku i ngjashëm që uljet tatimore të mos kalojnë te konsumatorët.