Deputeti socialist Erion Braçe u drejtua sot në Kuvend, më 9 prill 2026, me tone të ashpra ndaj ministrit të Bujqësisë Andis Salla, duke ngritur problematikat kryesore të fermerëve.
Braçe deklaroi se në javën e dytë të muajit janar pati një fushatë dezinformimi për qumështin e blegtorëve me aflatoksinë. Ai lexoi mesazhe nga grupe bujqësore në Bubullimë dhe Lushnjë, ku kompanitë refuzonin qumështin, e shkatërronin ose preferonin qumështin pluhur më të lirë. Përmendi përplasje me kompaninë Lufra dhe bëri thirrje për standarde prodhimi me pagesë për litër ose kilogram.
Ai kritikoi heqjen e naftës falas për fermerët në një moment të pafavorshëm, kur çmimet e naftës janë të larta dhe kriza vazhdon. «Ajo skemë ka këtë pjesë të mirë, por pjesën tjetër që keni hequr naftën falas në një moment krize rrit drejtpërdrejtë koston», u shpreh Braçe.
Një problem tjetër ishte rritja e çmimit të plehrave kimike. Braçe tha se justifikimi i shitësve për çmimet e bursës është i pavërtetë. Sipas të dhënave nga Doganat, nga 28 shkurt deri më 31 mars 2026, kanë hyrë vetëm 3 mijë tonë plehra kimikë pas nisjes së luftës në Lindjen e Mesme, ndërsa pjesa tjetër ishte importuar më parë. «Vendosini fre abuzimit, ndryshe fermerët nuk do marrin frymë», deklaroi ai, duke kërkuar verifikim në terren.