Erion Braçe, deputet i Partisë Socialiste, doli sot nga Gjykata e Posaçme Kundër Korrupsionit dhe Krimit të Organizuar (GJKKO) pas një seance lidhur me një padi për shpifje. Ai e cilësoi padinë si të rreme dhe me prapavijë politike.
Jashtë godinës së GJKKO-së, Braçe u pyet nga gazetarët për interesin e shprehur së fundmi për të kandiduar si kryetar bashkie në Tiranë. Këtij posti aktualisht i qëndron Erion Veliaj, i cili ndodhet në burg që nga shkurt i vitit të kaluar dhe kishte sot seancën e radhës të themelit në të njëjtën gjykatë.
Deputeti socialist u përgjigj se politikanët nuk duhet të diskutojnë proceset gjyqësore dhe vendimet e gjykatave. «Besoj që politikanët, proceset gjyqësore dhe vendimet e gjykatave nuk duhet t’i diskutojmë. Nuk komentoj as prokurorët as gjyqtarët», deklaroi ai.
Braçe shtoi se prezumimi i pafajësisë dhe barazia në proces, që lidhen me liritë dhe të drejtat e qytetarëve, janë elementë të rëndësishëm dhe lakmus për demokracinë. Ai theksoi se secili ka pozicionin e vet dhe drejtësinë e tij.