Romina Kuko, deputete e Partisë Socialiste, komentoi deklaratat e Erion Braçes lidhur me dëshirën për të kandiduar si kryebashkiak i Tiranës. E ftuar në emisionin "Off the Record" të A2 CNN, ajo u shpreh se nuk dëshiron të japë koment të plotë për një proces që ende nuk ka marrë formën e një diskutimi politik.
Kuko ndau vlerësimin e saj personal: "Unë dua ta ndaj pak në fillim, nuk dua të komentoj ende një proces që nuk ka marrë formën e një diskutimi politik. Kam një vlerësim të jashtëzakonshëm për deputetin Braçe, për temat që ai ngre, por mbi të gjitha për mënyrën se si ai e ushtron moralisht profesionin e deputetit, duke qenë gjithë kohës pranë komunitetit. Ky është mendimi im personal."
Ajo theksoi nevojën për drejtim të qartë në Bashkinë e Tiranës: "Mendoj që bashkia e Tiranës ka nevojë patjetër për një drejtim. Besoj që ngjarjet e këtij viti të fundit kanë krijuar një lloj avarie në mënyrën e funksionimit të qytetit. Ne e ndjejmë të gjithë."
Kuko nënvizoi madhësinë e Tiranës: "Po flasim për bashkinë më të madhe. Po flasim për një metropol. Tirana nuk është thjesht një qytet. Një lagje e Tiranës është sa gjithë qarku i Korçës, nëse e shohim në shifra. Ka nevojë për punë të përditshme, për pastërti, për rrugë, për çerdhe, kopshte, shkolla – për jetën e përditshme."