Gjatë raportimit në Komisionin Parlamentar Nisma Qytetare, kreu i Prokurorisë së Posaçme Kundër Korrupsionit dhe Krimit të Organizuar (SPAK), Klodian Braho, u pyet lidhur me zhvillimet për çështje të ndjeshme. Deputeti i Partisë Demokratike, Gjin Gjoni, kërkoi sqarime përse Kryeministri Edi Rama nuk është thirrur për të dhënë shpjegime për dosjen Albanian Files dhe çështjen e inceneratorëve.
Gjin Gjoni ngriti shqetësime mbi nivelin e korrupsionit, duke iu referuar renditjes së Shqipërisë në vendin e 91-të. Ai pyeti specifikisht nëse janë hetuar lidhjet mes kryeministrit dhe subjekteve që kanë porositur ndërtimin e kullave, si dhe mënyrën e pagesave të projekteve që sipas tij nuk janë miratuar ende. Deputeti theksoi se dosja e dorëzuar në SPAK përmban mbi 500 faqe dokumentacion.
Në përgjigje, Klodian Braho mbajti një qëndrim zyrtar, duke refuzuar të komentojë detajet e kallëzimeve që janë në fazën e hetimit. Ai nënvizoi se puna e prokurorisë bazohet ekskluzivisht mbi provat dhe nevojat hetimore.
"Nuk kam asnjë koment mbi çështjet konkrete. Nëse dikush ka prova, është i ftuar t’i depozitojë dhe të marrë përgjigje ligjore. Asnjë person nuk është imun ndaj SPAK. Këtë e them me bindje", u shpreh Braho.
Kreu i SPAK-ut adresoi edhe shqetësimet për sekuestrimin e pasurive të përfituara nga krimi. Ai sqaroi se kompetenca e institucionit përfundon me nxjerrjen e urdhrit të sekuestrimit, ndërsa procedura e mëtejshme zhvillohet në gjykatë. Braho shtoi se nuk ka dijeni për raste konkrete ku pasuritë e sekuestruara janë rishitur tek personat e mëparshëm përmes formave të tërthorta, por theksoi se çdo provë e re do të shqyrtohet në përputhje me ligjin.