Drejtuesi i Prokurorisë së Posaçme (SPAK), Klodian Braho, zhvilloi një takim lidhur me rekomandimet e qeverisë për vitin 2026, të cilat u prezantuan nga ministri i Drejtësisë, Toni Gogu. Braho vlerësoi nevojën për një angazhim ndërinstitucional, duke nënvizuar se përballja me format e reja të kriminalitetit nuk mund të realizohet nga një institucion i vetëm.
Sipas kreut të SPAK, strukturat kriminale po shfaqin tendenca drejt përdorimit të kriptovalutave dhe komunikimeve të enkriptuara, çka dikton nevojën për mjete moderne hetimore. "Hetimet ndaj grupeve kriminale kërkojnë më shumë teknologji dhe mbështetje buxhetore. Kjo nuk duhet parë si privilegj institucional, por si investim në aftësitë e institucioneve të drejtësisë," deklaroi ai. Braho shtoi se hetimi financiar dhe pasuror do të mbetet prioritet, pasi qëllimi është goditja e mekanizmave të përfitimit dhe rrjeteve mbështetëse, jo vetëm e autorëve individualë.
Bashkëpunimi ndërinstitucional
Në lidhje me bashkëpunimin ndërinstitucional, Braho kërkoi një rol më përkrahës nga ana e Policisë së Shtetit. Ai theksoi se krimi ka kapërcyer kufijtë kombëtarë, duke bërë të domosdoshëm koordinimin e shtuar me partnerët ndërkombëtarë. Analiza e rekomandimeve të qeverisë do të shërbejë për përcaktimin e masave që mund të merren menjëherë, krahas atyre që kërkojnë investime afatgjata.
Kjo deklaratë vjen në një kohë kur SPAK po përballet me ngarkesë të shtuar pune dhe pritshmëri të larta publike. Kujtojmë se në të kaluarën, drejtuesit e institucionit kanë shprehur rezerva lidhur me numrin e kallëzimeve nga Policia e Shtetit, duke vënë në dukje rëniet e konstatuara në periudhat e mëparshme.