Konfederata Braziliane e Futbollit (CBF) ka ndërmarrë hapa zyrtarë kundër gjyqtarit meksikan Cesar Ramos, pas episodeve të ndodhura në ndeshjen e fazës së grupeve në Kupën e Botës kundër Skocisë. Pavarësisht fitores së thellë me rezultatin 3-0, drejtuesit brazilianë kanë shprehur pakënaqësi për anulimin e një goli të shënuar nga Vinicius Junior.
Në minutën e 21-të, pas ndërhyrjes së teknologjisë VAR, gjyqtari Ramos vendosi ta anulojë golin për një faull të pretenduar ndaj mbrojtësit skocez Jack Hendry. Stafi teknik i Brazilit, i drejtuar nga Carlo Ancelotti, argumentoi se kontakti ishte minimal dhe nuk përmbushte kriterin e "gabimit të qartë dhe evident" që kërkohet për ndërhyrjen e sistemit të videos.
Presidenti i CBF-së, Samir Xaud, i ka dërguar një letër zyrtare presidentit të FIFA-s, Gianni Infantino, ku thekson mungesën e konsistencës në vendimet gjyqësore gjatë turneut. Në këtë dokument, federata përmend edhe raste të ngjashme, siç është goli i Lionel Messit ndaj Austrisë, ku aksione me dyluftime të ngjashme janë lejuar nga gjyqtarët.
Përveç këtij rasti, CBF i është referuar një "historie negative" me Cesar Ramos, duke kujtuar përballjen e Brazilit me Zvicrën në Kupën e Botës 2018. Sipas federatës, arbitri në fjalë ka dëmtuar skuadrën edhe në atë rast, çka përforcon kërkesën e tyre që ai të mos caktohet më në asnjë ndeshje të Brazilit në këtë turne që po zhvillohet në Amerikën e Veriut.
Brazili pritet ta vazhdojë rrugëtimin në fazën me eliminim direkt, ku të hënën do të ndeshet me Japoninë për 1/16-ën e finales.
Përditësime
Konfederata Braziliane e Futbollit (CBF) i ka kërkuar zyrtarisht FIFA-s përjashtimin e gjyqtarit Cesar Ramos, duke kontestuar mënyrën e përdorimit të sistemit VAR gjatë ndeshjes. CBF vë në dyshim interpretimin e protokolleve teknologjike, ndërsa lojtarët e Skocisë kanë shprehur gjithashtu pakënaqësi për anulimin e golit dhe paqartësitë në ndërhyrjen e sistemit video.