Në Britani, 31-vjeçari Steven Garner akuzohet për vrasjen e partneres së tij, Amber O’Brien, 33 vjeçe, e cila ishte shtatzënë me binjakë. Sipas dëshmive të paraqitura në gjykatë, ngjarja ndodhi pas një konflikti mes çiftit në prill të vitit të kaluar. O’Brien u godit më shumë se 60 herë me thikë, kryesisht në fytyrë dhe qafë.
Trupi i saj u gjet në dyshemenë e banjës së banesës ku jetonte me Garnerin. Sipas prokurorisë, ajo ishte e zhveshur dhe e mbuluar me një mushama blu. Mjeku ligjor kishte dokumentuar më shumë se 60 plagë të shkaktuara nga thika, përfshirë 32 në fytyrë dhe qafë.
Sipas akuzës, Garner kaloi rreth një ditë e gjysmë duke u përpjekur të fshihte gjurmët. Ai dyshohet se lau trupin, pastroi banesën me zbardhues, largoi rrobat e përgjakura dhe shkatërroi telefonin e O’Brien, ndërsa hodhi edhe telefonin e vet. Policia shkoi në banesë pasditen e 19 prillit, pasi Garner dyshohet se i kishte thënë një të afërmi se e kishte goditur partneren dy herë në qafë.
Gjatë gjyqit u përmend se O’Brien i kishte treguar vëllait për debatet e shpeshta me partnerin dhe shqetësimin për ndryshimet e humorit të tij. Rreth dy javë para ngjarjes, ajo i kishte thënë se diçka nuk shkonte me të dhe kishte shprehur shqetësim për situatën.
Garner pritet të thotë se nuk kishte pasur qëllim t’i shkaktonte partneres dëmtime të rënda trupore dhe se në çastin e ngjarjes kishte humbur vetëkontrollin. Ai pritet të deklarojë gjithashtu se ishte përpjekur të largohej nga banesa në orët e para të 18 prillit, por se O’Brien e kishte goditur me grusht dhe kishte mbajtur një thikë. Procesi gjyqësor vijon, ndërsa pretendimet e palëve dhe rrethanat e ngjarjes po shqyrtohen nga drejtësia britanike.