Deputeti i Aleancës për Ardhmërinë e Kosovës, Burim Ramadani, ka rikthyer në vëmendje qëndrimin e mbajtur nga Ramush Haradinaj më 26 qershor 2015 në lidhje me themelimin e Gjykatës Speciale. Nëpërmjet një shkrimi në rrjetin social Facebook, Ramadani citoi thirrjen e bërë nga Haradinaj drejtuar deputetëve të Kuvendit të Kosovës për të kundërshtuar procesin.
Sipas Ramadanit, në atë kohë Haradinaj kishte kërkuar nga deputetët që të mos votonin amendamentet kushtetuese, të cilat i hapën rrugë formimit të Dhomave të Specializuara. Përmes citimit, Haradinaj kishte deklaruar: "26 qershor 2015 – Aleanca dhe Ramush Haradinaj ishte kundër Gjykatës Speciale. Bëri thirrje që të mos votohen amendamentet kushtetuese. E kishte të qartë se Gjykata Speciale po bëhej një monstrum juridik".
Ky veprim i deputetit Ramadani vjen në një kohë kur ka zhvillime të reja lidhur me proceset gjyqësore në Dhomat e Specializuara të Kosovës që ushtrojnë veprimtarinë e tyre në Hagë.