Pas zgjedhjeve të jashtëzakonshme të 28 dhjetorit dhe rinumërimit të votave, janë evidentuar parregullsi ku disa kandidatë për deputetë kanë marrë vota shtesë, ndërsa të tjerëve u janë hequr ato.
Ndonëse asnjë deputet që doli me më shumë vota nuk ka dhënë dorëheqje, anëtarët e shoqërisë civile vlerësojnë se ata duhet të largohen vetë nga Kuvendi. Eugen Cakolli, në një prononcim për Gazetën Metro, deklaroi se largimin e tyre mund ta realizojnë edhe partitë përkatëse.
Ai u shpreh se, për nga prizmi moral, kandidatët duhet të largohen vetë, sidomos ata që dallimin në vota e kanë me mijëra, derisa të ketë sqarim. "Nëse partitë do të ishin të interesuara për parimet e integritetit zgjedhor, do t'ua kërkonin ose do t'i largonin të paktën nga strukturat", tha Cakolli. Ai shtoi se prania e tyre minon besimin e publikut në rolin përfaqësues të Kuvendit.
Sipas tij, ligjërisht mandati nuk mund t'ua merret deputetëve pa vendim gjyqësor që vërteton përfshirjen në keqpërdorim votash. Në bazë të ligjit për zgjedhjet e përgjithshme, Kushtetutës dhe aktgjykimeve të Gjykatës Kushtetuese, nevojitet dënim i formës së prerë nga apel, të paktën me një vit burgim efektiv. Proceset gjyqësore zgjasin tepër gjatë, prandaj deputetët që siguruan ulëse pavarësisht dyshimeve mbeten në pozita.