Gjykata Themelore në Ferizaj ka caktuar masën e paraburgimit ndaj Arjeta Roshajt, e dyshuar për vrasjen e 32-vjeçarit F.H. Sipas vendimit të gjykatës, ngjarja ka ndodhur brenda banesës së të dyshuarës më 28 qershor.
Në deklaratën e saj para hetuesve, Roshaj ka shpjeguar se viktima e kishte kërcënuar përmes rrjetit social Snapchat, duke i shkruar “më prit se tani do të vij të vras ty dhe familjen tënde”, si dhe një mesazh tjetër me fjalën “qele”. E dyshuara ka pohuar se kishte mbetur në gjendje të rëndë shoku kur kishte parë viktimën para derës së banesës, pasi ai e kishte kërcënuar disa herë më parë në të njëjtën mënyrë, por nuk ishte paraqitur.
Avokati mbrojtës i caktuar sipas detyrës zyrtare, Genc Kadriu, ka sqaruar detajet e seancës dëgjimore. Sipas dëshmisë, pasi viktima ka hyrë në banesë, ai e ka kapur për flokësh Roshajn dhe ka filluar ta godasë në kokë. E dyshuara ka deklaruar se është përpjekur të mbrohet duke përdorur një shishe qelqi për ta trembur viktimën, proces gjatë të cilit ajo ka marrë lëndime trupore.
Sipas vendimit, viktima gjatë gjithë kohës ka qenë i pajisur me një armë zjarri. E dyshuara ka deklaruar se ka arritur t’ia marrë armën nga dora me qëllim që të mbronte prindërit e saj, të cilët ndodheshin në një dhomë tjetër. Në momentin që ajo e ka kapur armën, viktima është kthyer nga ajo dhe arma ka shkrepur, duke rezultuar në vdekjen e F.H.