Çekia konfirmon mbështetjen për integrimin e Maqedonisë së Veriut në BE

Zëvendëskryeministri dhe ministri i Punëve të Jashtme i Republikës Çeke, Petr Macinka, zhvilloi një vizitë zyrtare në Maqedoninë e Veriut, ku në takimin me ministrin e Punëve të Jashtme dhe Tregtisë së Jashtme, Timço Mucunski, rikonfirmoi mbështetjen e Pragës për rrugëtimin evropian të vendit. Në takimin e zhvilluar në Vilën “Ohri”, dy ministrat diskutuan për thellimin e bashkëpunimit ekonomik, infrastrukturor, arsimor dhe kulturor.

Integrimi evropian dhe dialogu me Sofjen

Ministri Macinka theksoi se integrimi i Maqedonisë së Veriut është prioritet për Çekinë, duke shtuar se vendi i tij është i gatshëm të ndajë përvojën nga procesi i tij i anëtarësimit për të shmangur gabimet e së kaluarës. Ai vlerësoi se mosmarrëveshja me Bullgarinë ka evoluar në një çështje shumëpalëshe pas konkluzioneve të Këshillit Evropian të vitit 2022.

Sipas Macinkës, Çekia mund të kontribuojë në ndërmjetësimin e kësaj çështjeje, ndërsa bëri të ditur se kryeministri çek, Andrej Babish, pritet ta vizitojë Bullgarinë pas rreth tri javësh, ku çështja mund të jetë pjesë e diskutimeve dypalëshe. Macinka nënvizoi se konsensusi është thelbësor për funksionimin e Bashkimit Evropian.

Nga ana e tij, ministri Mucunski shprehu gatishmërinë e Qeverisë për të vazhduar dialogun për gjetjen e një zgjidhjeje, por mbajti një qëndrim të palëkundur:

• Çështjet e identitetit, gjuhës, historisë dhe kulturës maqedonase nuk mund të jenë objekt negociatash.
• Procesi i integrimit duhet të bazohet në merita, rezultate konkrete dhe standarde evropiane, jo në kritere dypalëshe.
• Maqedonia e Veriut kërkon një rrugë të parashikueshme drejt anëtarësimit në BE.

Mucunski theksoi se vizita ndodh në vitin kur festohet 35-vjetori i pavarësisë së vendit dhe dekada e katërt e marrëdhënieve diplomatike me Çekinë, duke e cilësuar këtë të fundit si një partner kyç evropian dhe euroatlantik.