Kryetari i Kuvendit të Shqipërisë, Niko Peleshi, zhvilloi më 2 nëntor, në Pragë, takime me kryetarin e Dhomës së Deputetëve të Parlamentit çek, Tomio Okamura, dhe presidentin e Senatit, Miloš Vystrčil, gjatë një vizite zyrtare në Republikën Çeke.
Në takime u vlerësuan marrëdhëniet dypalëshe mes Shqipërisë dhe Republikës Çeke, të mbështetura në miqësinë tradicionale, dialogun e vazhdueshëm politik dhe vlerat e përbashkëta europiane. Palët shprehën vullnetin për të zgjeruar bashkëpunimin, veçanërisht në marrëdhëniet ndërparlamentare dhe shkëmbimet mes institucioneve, si dhe në fushat e ekonomisë, turizmit dhe arsimit.
Peleshi vlerësoi mbështetjen e vazhdueshme të Republikës Çeke për anëtarësimin e Shqipërisë në Bashkimin Europian dhe qëndrimin e saj në favor të një procesi zgjerimi të bazuar në meritë. Ai theksoi se mbështetja politike e vendeve anëtare është veçanërisht e rëndësishme në këtë fazë vendimtare të negociatave. Sipas tij, Shqipëria vijon punën për përmbushjen e reformave dhe për objektivin strategjik të anëtarësimit në BE.
Një pjesë e bisedimeve iu kushtua perspektivës europiane të Ballkanit Perëndimor dhe rolit të vendeve të Grupit të Vishegradit në mbështetjen e integrimit të rajonit. Palët vlerësuan bashkëpunimin dhe koordinimin mes parlamenteve si mënyra për ta mbajtur zgjerimin e BE-së në fokusin e agjendës politike europiane.
Sa i përket bashkëpunimit parlamentar, Peleshi nënvizoi rëndësinë e shtimit të kontakteve mes drejtuesve të parlamenteve, komisioneve parlamentare dhe grupeve të miqësisë. Ai vlerësoi rivendosjen e aktivitetit të Grupit të Miqësisë Çeki-Shqipëri në Dhomën e Deputetëve dhe shprehu interes për zgjerimin e shkëmbimeve, përfshirë bashkëpunimin mes komisioneve që mbulojnë çështjet europiane dhe politikën e jashtme.
Bashkëpunimi parlamentar u vlerësua gjithashtu si mundësi për afrimin e mëtejshëm të dy vendeve përmes shkëmbimit të përvojave institucionale, praktikave të mira dhe nismave që forcojnë lidhjet mes qytetarëve dhe komuniteteve lokale. Në përfundim, palët riafirmuan rëndësinë e dialogut dhe bashkëpunimit dypalësh, si dhe kontributin e diplomacisë parlamentare për paqen, sigurinë dhe stabilitetin në rajon. Sipas burimeve, një Ballkan Perëndimor më i integruar dhe bashkëpunues është në interes të përbashkët dhe faktor për një Europë më të bashkuar e më të sigurt.