Peleshi takohet me Metsolën në Bruksel për procesin e integrimit

Niko Peleshi, kryetar i Kuvendit të Shqipërisë, u takua më 26 janar 2026 në Bruksel me Presidenten e Parlamentit Europian Roberta Metsola.

Vizita u zhvillua në kuadër të intensifikimit të diplomacisë parlamentare dhe angazhimeve të Kuvendit për avancimin e procesit të anëtarësimit të Shqipërisë në Bashkimin Europian.

Gjatë takimit, Peleshi shprehu vlerësimin për mbështetjen e vazhdueshme të Parlamentit Europian ndaj Shqipërisë. Ai theksoi se perspektiva europiane e vendit mbetet e qartë, afatgjatë dhe e pakthyeshme. Anëtarësimi në Bashkimin Europian, sipas tij, nuk është slogan politik, por proces transformues i institucioneve, qeverisjes dhe jetës së përditshme të qytetarëve, i mbështetur nga konsensusi politik-parlamentar dhe mbështetja popullore.

Në fokus ishte progresi i Shqipërisë në përmbushjen e kushteve të negociatave, veçanërisht në kapitujt e sundimit të ligjit, reformës në drejtësi, luftës kundër korrupsionit dhe krimit të organizuar, si dhe mbrojtjes së të drejtave themelore. Peleshi vuri në dukje se Shqipëria është vendi kandidat me vendosmërinë më të madhe dhe shpejtësinë më të lartë drejt familjes europiane, me reforma të bazuara në rezultate konkrete dhe tregues të matshëm.

Palët diskutuan kontributin e Kuvendit në procesin e anëtarësimit, si dhe përmirësimet ligjore-strukturore për të përshtatur rolin e tij qendror.

Roberta Metsola vlerësoi progresin e dukshëm të Shqipërisë, bashkëpunimin e mirë mes Parlamentit Europian dhe Kuvendit, si dhe angazhimin parlamentar-institucional për përshpejtimin e integrimit. Hapja e Zyrës Rajonale të Parlamentit Europian në Tiranë u cilësua si sinjal i qartë i angazhimit të Bashkimit Europian ndaj Shqipërisë dhe perspektivës së saj europiane.