Oda Ekonomike e Kosovës (OEK) ka njoftuar se është akredituar zyrtarisht në Paris nga Oda Ekonomike Ndërkombëtare dhe Federata Botërore e Odave Ekonomike për lëshimin e Certifikatave të Origjinës. Kjo është hera e parë në historinë e Republikës së Kosovës që këto dokumente do të gëzojnë vlefshmëri të njohur globalisht.
Sipas përfaqësuesve të OEK-ut, ky proces është rezultat i një pune të gjatë institucionale dhe profesionale. Ky hap strategjik pritet të ketë ndikim të drejtpërdrejtë në disa drejtime kryesore për ekonominë e vendit:
• Forcimi i eksportit të produkteve kosovare.
• Rritja e besueshmërisë dhe kredibilitetit të bizneseve vendore në tregjet ndërkombëtare.
• Digjitalizimi dhe modernizimi i shërbimeve tregtare.
• Mbështetja më efikase e prodhuesve dhe eksportuesve të Kosovës.
Ky akreditim i jep dimension të ri produkteve që mbajnë emrin “Made in Kosova”, duke mundësuar një integrim më të thellë të ekonomisë së vendit në tregjet botërore.