Klubi i Chelsea-t ka shfaqur interes të vazhdueshëm për kapitenin e Sunderland-it, Granit Xhaka, pavarësisht refuzimit të propozimit fillestar nga ana e drejtuesve të skuadrës angleze. Sipas raportimeve nga Anglia, londinezët kishin ofruar fillimisht rreth 8 milionë funte, por ky propozim nuk u pranua nga klubi nga veriu i Anglisë, të cilët theksuan se nuk kanë ndërmend të heqin dorë nga një prej lojtarëve më të rëndësishëm të skuadrës.
Chelsea pritet të paraqesë një ofertë të re, e cila raportohet se mund të shkojë nga 10 deri në 12.5 milionë funte, duke përfshirë bonuse shtesë. Shtytësi kryesor i këtij operacioni është trajneri Xabi Alonso, i cili kërkon të punojë sërish me mesfushorin shqiptar, pas bashkëpunimit që ata patën te Bayer Leverkusen. Nga ana tjetër, te Chelsea ekziston një dozë hezitimi për të investuar shuma të mëdha për një futbollist që tashmë është 33 vjeç.
Sunderland mbetet i palëkundur në qëndrimin e tij. Klubi e konsideron lojtarin si lider të mesfushës dhe figurë thelbësore për strategjinë e trajnerit Regis Le Bris. Duke qenë se Sunderland e transferoi Xhakën nga Bayer Leverkusen për 17.5 milionë funte vetëm një vit më parë, drejtuesit synojnë të shmangin një humbje financiare. Për më tepër, situata është bërë më komplekse për faktin se Sunderland siguroi një vend në Ligën e Evropës sezonin e kaluar, duke u renditur mbi Chelsea-n në kampionat.