Klubi i Sunderlandit ka bërë të qartë se mesfushori Granit Xhaka nuk është në shitje, duke refuzuar ofertën e parë zyrtare të paraqitur nga Chelsea. Sipas raportimeve të gazetarit David Ornstein, oferta prej 8 milionë paundësh u konsiderua e papranueshme nga drejtuesit e Sunderlandit, të cilët theksuan se nuk do të shqyrtojnë asnjë propozim tjetër për 33-vjeçarin.
Interesimi i Chelseat vjen me kërkesë të trajnerit të ri, Xabi Alonso, me të cilin Xhaka ka bashkëpunuar më parë te Bayer Leverkuseni. Pavarësisht qëndrimit të prerë të klubit anglez, gazetari Florian Plettenberg raportoi se Chelsea pritet të zhvillojë raunde të reja bisedimesh, duke vlerësuar se transferimi mbetet një mundësi ende e hapur.
Granit Xhaka iu bashkua Sunderlandit verën e kaluar dhe pati një kontribut thelbësor në renditjen e skuadrës në vendin e shtatë, duke siguruar pjesëmarrjen në Europa League. Në sezonin e kaluar, ai regjistroi 34 paraqitje, një gol dhe gjashtë asistime. Aktualisht, kapiteni është i angazhuar me kombëtaren e Zvicrës në Kampionatin Botëror 2026, ku po përgatitet për fazën e eliminimit direkt kundër Algjerisë.
Përditësime
Granit Xhaka ka arritur marrëveshje personale me Chelsea-n dhe po kërkon largimin nga Sunderland-i. Klubi anglez ka refuzuar ofertën fillestare prej 8 milionë paundësh, duke e cilësuar atë si të pamjaftueshme. Për ta lënë të lirë mesfushorin, Sunderland kërkon të paktën 20 milionë euro, shifra e investuar për transferimin e tij gjatë verës së kaluar.
Mesfushori Granit Xhaka ka shprehur dëshirën për t'u transferuar te Chelsea, raporton gazetari Fabrizio Romano. Pas refuzimit të ofertës së parë nga Sunderland, londinezët po përgatisin një propozim të dytë për lojtarin.