Një cisternë për transportin e naftës është bërë shënjestër e një sulmi të armatosur në ujërat ndërkombëtare pranë brigjeve të Jemenit. Lajmi u konfirmua nga Agjencia Britanike për Sigurinë Detare (UKMTO), e cila raportoi se incidenti ndodhi 111 milje detare në juglindje të Adenit.
Sipas të dhënave, një varkë e vogël me 4 persona të armatosur iu afrua anijes tregtare dhe hapi zjarr duke përdorur një raketëhedhës RPG. Autoritetet britanike kanë nisur hetimet për të zbardhur rrethanat e plota të sulmit, megjithatë deri në këto momente nuk janë dhënë detaje mbi identitetin e autorëve apo motivet e këtij veprimi. Gjithashtu, nuk ka informacione të konfirmuara mbi gjendjen e ekuipazhit apo dëmet e mundshme të shkaktuara në anije.
Zona e Gjirit të Adenit dhe Detit të Kuq përbën një prej korridoreve kryesore për tregtinë botërore detare. Vitet e fundit, ky rajon është përballur me incidente të shumta sigurie, të cilat vazhdojnë të krijojnë shqetësim për sigurinë e lundrimit ndërkombëtar.